من الأول.....كلمات الشاعر فهـــــــمي علي

و كان عايش كما العايشين
مفيش فى حياته غير حلمه
و كام كلمة على ورقه
فى جيب مسحور حسب علمه
بتاخده الدنيا و تجيبه
ما بين ضحكة و بين دمعة
و ناس مدفونة فى وشوشها
لاهى شايفة و لا سامعة
و ايام عادى بتعدى
بيسمع كل يوم ثومة
و هى بتقصده بغنوة
تمسه باهة مكتومة
لا عارف يوم يصدقها
و لا قادر ما يسمعهاش
عشان قلبه اللى لسه اخضر
مواعد حلم لسه مجاش
و حلمه لسه فى ضلوعه
بيسأل كل يوم عنها
هتيجى و لا مش ناوية
و فين فى الدنيا عنوانها
سنين تجرى ... يفوت عمره
خطوط الحلم ما بتدبلش
يشوف بعيونه ناس ياما
و روحه تعصى و ما تقبلش
يحاول يبقى مش هو
فيغرق فى الحياة و يدوب
و يرضى ... و نفسه من جوا
تعانده ... و تمشى بالمقلوب
يزود بعده عن حلمه
تقرب روحه و تعافر
يعود للدنيا و الزحمه
خياله يسيبه و يسافر
و فجأة تمطر الدنيا
مطر يشبه لاحلامه
فتضحك روحه من جوا
و تانى يحب ايامه
و من غير اذن تتبدل
حاجات ف عنيه فيعشقها
و يسمع ثومة من تانى
يلاقى نفسه صدقها
فترجع به سنين عمره
يحس الحلم بيقرب
يبات يقراه .. و يحكى معاه
حاجات جواه بتتسرب
و تيجى حروفها فتضمه
يغيب فيها و ينسى الكون
تمد ايديها على روحه
تلملم بين ضلوعه الكون
تقابله ... يتولد تانى
ولد عاشق بيتعلم
بتشبه كل تفاصيله
بدون حتى ما تتكلم
يتوه ميت توهة فى اللحظة
من السحر اللى جواها
فيحلف انها هى
مفيش ولا حاجة نقصاها
ويتلاقو ف ضل الشوق
ينام الحلم جواهم
انا عاشق ... و انا عاشقة
هنا .... و الدنيا تنساهم