لا تطولي ارجعي****للشاعر رامز عيد

لا تطولي ارجعي

يللي قفلتي الباب نويانه السفر
قلبي بدمعو داب عالعتمة سَكَر
من يومها ما غفيت بالعتم سهران
رمشي ع بابك دق متجرح وولهان
لو تسألي البواب شو حكيت القمر

وشموع وقناديل بالويل عم تبكي
وزهور و شحارير بعويل عم تشكي
وسراب و تصاوير مواويل شو تحكي
والآه جرحة صمت طفيت بالسهر

والفجر شق بنور بالشمس زعلان
سافر وليف الروح بالهمس الضحر
والحقل صرح زهور عالاسا تكيان
تارك حبيبي جروح عالشوق انعصر

لا تتركي هالقلب ع جمرتو ولعان
والآخ شوك الدرب بالدعسة انعثر
والدم يكتب حب بهجرتك بكيان
عودي كفاني عذاب عطشانك نظر

عودي كفاني فراق لاطولي السفرة
قلبي شقي هلكان موجوع عالنطرة
بُعدك ضني عشقان موهوم بالحسرة
غيابك كواني عيون ودموعي زخر

شو بتنفع الايام لو حبي غبر؟

رامز عيد