وين الوفا***&**بقلم رامز عيد

وين الوفا؟

وين الوفا والحب للاوطان
ارض الحما عم تنزف ترابو
وين الصفا و الدرب مليان
دم و حصى لملطوخ بشابو

وين الوفا و سهولنا وديان
صخر الجبل تتفتت قبابو
وين الوفا و الشعب هلكان
صار الشرع مسلوب بصحابو

وين الوفا و الصفا حرمان
ندق القدر ع خشبة صلابو
وين الوفا يا محبسة رهبان
شيوخ المساجد والدين و عيابو

لا دين ينصفنا برحمة الرحمان
وقاضي المحاكم ل يهتم بجيابو
وينو ناطور الكرم وين سهران
دياب الليالي عم تسرح بغابو

شبعنا اسا و الحمل تقلان
علقان رمش الليل بعذابو
شبعنا قسا و القلب ورمان
صرخ الصدى تتوصد بوابو

خلوا الحكم لمحبة النسوان
فجر الامومة والحب وعبابو
ما يوم خلت ابنها جوعان
ترجّع زمان العز لنصابو

الام الوحيدة لحبها منصان
بتعطي بلا مردود وحسابو
نبع الوفا والخير و التحنان
متل الارض خيرات بلبابو

رامز عيد
٢٣/٠٤/٢٠١٦